Schleife language guide “Ho zachopjonku jo było to słowo”

Za Slepjansku wariantu serbšćiny njebě hač do lěta 2022 žaneje wučbnicy. Wot tutoho lěta pak steji zajimowanym wobšěrna publikacija k dispoziciji. Rěčny přewodnik „Slěpjański rozprajak – Ho zachopjonku jo było to słowo / Schleifer Sprachführer – Im Anfang war das Wort“ chce z rěču a regionom zeznajomić a stwori wuměnjenja za awtodidaktiske nawuknjenje so pozhubjowaceje rěče. Wón předleži jako ćišćana kniha, kotraž je wušła w kooperaciji ze Slepjanskim towarstwom Kólesko. Na tutych stronach poskićamy Wam cyły informaciski dźěl kaž tež wućahi dalšich dźělow přewodnika, kotrež so w sćěhowacym wopisuja.

Kniha wobsteji z informaciskeho, konwersaciskeho a gramatiskeho dźěla kaž tež z němsko-Slepjanskeje słowneje lisćiny.

Hladajo do zapiska wobsaha móžeće sej najjednorišo a najspěšnišo zaćišć wo natwarje a wobjimje rěčneho přewodnika stworić.

W informaciskim dźělu su zestajane teksty, w kotrychž wujasnjeja so pozadki Slepjanskeje rěčneje krajiny, Slepjanskeje serbšćiny kaž tež kulturnych a historiskich wosebitosćow. Tu namakaja so tež zawodne pokiwy k wužiwanju knihi, k wurjekowanju a informacija wo někotrych rozsudach, kotrež běchu trěbne, zo by so hewak skerje ertnje wužiwana rěčna forma ze swojim bohatstwom wariantow w jednotnym prawopisu předstajić hodźała.

Konwersaciski dźěl je rozrjadowany do 13 temowych wobłukow, tute pak do podkapitlow. W podkapitlach předstajeja so najprjedy někotre z temu zwjazane wokable, sćěhuja přidatne informacije wo Slepjanskej serbšćinje a kulturje wšědneho dnja, dialog abo wotkaz na wažne wotrězki w druhich kapitlach. Hłowny dźěl podkapitlow tworja sady a wobroty jako pomoc za dorozumjenje w rozmołwje. W 14. kapitlu su spěwy, hrónčka, anekdoty, hry a prajidma ze Slepjanskeje wosady zezběrane.

Gramatiski dźěl poskića zakładne informacije wo Slepjanskej gramatice. Wobmjezujemy so na krótke wopisanje substantiwow, adjektiwow, pronomenow, numeralow a werbow a předstajamy jich typiske skłonjowanske mustry. Nimo toho słuša ke gramatiskemu dźělej přehlad wo negaciji kaž tež lisćina prepozicijow.

Słowničk na kóncu rěčneho přewodnika wobsahuje nimale 2 700 słowow a reprezentuje z tym zakładny słowoskład Slepjanskeje serbšćiny. W tutym słowničku pak jewja so jenož słowa, kotrež wužiwaja so w konwersaciskim dźělu (1. do 13. kapitl), tuž njejedna so wo słownik we wušim zmysle.