W inwentarizaciskim a dokumentaciskim projekće k Slepjanskej rěčnej krajinje su so pisomne žórła za słownymi lisćinami a słowničkami přepytali. Tak je so za Slepjansku serbšćinu 19 słownych zběrkow zwěsćiło, kotrež su so wot prěnjeje połojcy 18. lětstotka nahromadźili. Jedna so z wjetšeho dźěla wo historiske žórła hač do lěta 1958. K tomu přińdu zběrki z pólnych slědźenjow kaž na přikład archiw słowoskłada, nahromadźeny wot Hynca Rychtarja, a dialektalne dokłady w Serbskim rěčnym atlasu. Dalša słowna lisćina je w zwisku z dźěłom na Slepjanskim přewodniku nastała. Pola někotrych zběrkow móžachmy so na hižo eksistowace wotpiski našeho kooperaciskeho partnera, Slepjanskeho towarstwa Kólesko, zepěrać.
Přez wubranje jednotliweho žórła w filtrje słownych zběrkow móžeće sej wotpowědnu zběrku wobhladać. W informaciskich tekstach k tutomu filtrej je kóžde mjenowane žórło z přisłušnym zapiskom w bibliografiji zwjazane.
Dokelž jewja so w žórłach často rostlinowe mjena, poskićamy wosebite pytanje po mjenowych typach. Dalše mjena namakaće w temowym wobłuku Slepjanske ležownostne mjena.
Słowne lisćiny njefunguja kaž słownik w poprawnym zmysle. Wašnje pisanja a słowne warianty bazuja wuraznje na awtorskich zapisach. Wotbłyšćujemy jeničce wobstejace žórła a njerukujemy tuž ani za wobsahi ani za dospołnosć zběrki.