Rěcy slěpjańskich napisow

Zarjadniski zwjazk Slepo słuša k oficialnje připóznatemu tak mjenowanemu „prěnjotnemu sydlenskemu rumej“ Serbow w zwjazkowym kraju Sakskej. Zarjadniska rěč je pódla němčiny hornjoserbšćina. Jenož w sydom wsach Slepjanskeje wosady pak rěči so wosebita warianta serbšćiny: Slepjanska serbšćina, kotraž słuša k přechodnym dialektam mjez hornjo- a delnjoserbšćinu (přir. Slepjanski dialekt w Serbskim kulturnym leksikonje).

W zjawnym rumje Slepjanskeje wosady namakamy pódla němskich napisow tež hornjoserbske a tajke w Slepjanskej serbšćinje. Hladajo na bliskosć k susodnej Braniborskej, hdźež rěči so delnjoserbšćina, jewja so – w rědšich padach – tež delnjoserbske napisy.

Njeje tež daloko hač k pólskej hranicy, a tuž namakaja so w jednotliwych padach tež pólske napisy, wosebje w turistiskich kontekstach. W Trjebinje je nimo toho pohrjebnišćo za sowjetskich wojakow, padnjenych w aprylu 1945, jeho centralny pomnik ma ruski napis.

Tafle z hornjoserbšćinu přewažuja, wšako je to za wjesne a dróhowe tafle a pućniki běžna a zakońsce předpisana praksa, tuž wone wosebje napadnu. Slepjanske serbske napisy jewja so porno tomu skerje w priwatnje, na př. wot towarstwow iniciěrowanym wobłuku.

Zwjetša namakatej so na taflach a druhich pismonošakach w Slepjanskim regionje dwě rěči, při čimž je němčina dominowaca rěč. Pódla toho jewi so jedna z horjeka mjenowanych serbskich rěčnych formow abo dalša rěč, na př. pólšćina. Sporadisce namakaja so tež jednorěčnje serbske napisy. Třirěčnych napisow w zjawnym rumje Slepjanskeje wosady njeje, chiba zo wustupuja přez kopjenje plakatow w informaciskich kašćikach wjacore rěče pódla sebje.