Schleife region and its languages

Wsy

Wosadna wjes Slepo jako srjedźišćo sydom wsow spožča regionej swoje mjeno: Cyły region, wosada a jeje wsy so husto skrótka jenož „Slepo“ mjenuja (přir. Slepjanski region w Serbskim kulturnym leksikonje). Sydom Slepjanskich wsow słušeja k třom gmejnam, tute pak su zjednoćene w zarjadniskim zwjazku Schleife / Slepo.

Slepo (němsce Schleife, w Slepjanskej serbšćinje Slěpe), Mułkecy (němsce Mulkwitz, w Slepjanskej serbšćinje Mułkoce) a Rowno (němsce Rohne, w Slepjanskej serbšćinje Rowne) přisłušeja Slepjanskej gmejnje.

Dźěwin (němsce Groß Düben) a Brězowka (němsce Halbendorf) tworitej gmejnu Dźěwin (w Slepjanskej serbšćinje Dźěwin a Brjezowka).

Trjebin (němsce Trebendorf) a Miłoraz (němsce Mühlrose) tworitej gmejnu Trjebin. K Miłorazej słuša wjesny dźěl Rula (němsce Ruhlmühle). Mjenowane hornjoserbske mjena kryja so ze Slepjanskimi. Wot lěta 2021 słuša tež nowy Miłoraz k Slepjanskej gmejnje, sydlišćo Miłoražanow, přesydlenych dla so bližaceje Wochožanskeje brunicoweje jamy.

Stawizny Slepjanskeho regiona

Informacije k stawiznam Slepjanskeho regiona namakaće pod hesłom Slepjanski region w Serbskim kulturnym leksikonje.

Rěče w Slepjanskich wsach

Byrnjež dźensa němčina přewažowała, je něhdyši serbski charakter Slepjanskeho regiona hišće spóznajomny: Nimo hornjoserbšćiny, kotraž wuči so wot 1950tych lět jako cuza rěč w šuli a kotraž wužiwa so jako zarjadniska rěč tež na oficialnych taflach, je tež prěnjotna Slepjanska rěč (slěpjańšćina abo Slěpjańska serbšćina) prezentna. Čitajće wo tym wjace pod hesłom Slepjanski dialekt w Serbskim kulturnym leksikonje kaž tež w tekstomaj „Im Anfang war das Wort“ a „Der Dialekt von Schleife“ z pjera Hynca Rychtarja w informaciskim dźělu Slepjanskeho rěčneho přewodnika.