Identiske formy w standardnej rěči a w Slepjanskej serbšćinje

W někotrych namakanych napisach – dalokož njejedna so wo wjesne abo dróhowe tafle resp. pućniki – móže so jenož na zakładźe awtorstwa zwěsćić, hač jedna so wo napis w Slepjanskej serbšćinje abo w jednej ze serbskeju spisowneju rěčow, dokelž so rěčna forma w tutych padach njerozeznawa, to rěka w tajkich padach, hdźež so forma w Slepjanskej serbšćinje z tej w hornjo- a/abo delnjoserbšćinje kryje: Mlokowa rampa oder Lutherowa lipa , a tohorunja słowo Witaj , kotrež pokazuje na serbskorěčny kubłanski princip w Rownjanskej pěstowarni. Tohodla podawamy (tež hdyž je awtorstwo jasne a z tym znate, hač je hornjoserbski abo Slepjanski napis měnjeny) wotpowědne tafle zdobom mjez hornjoserbskimi a Slepjanskimi napisami. (Delnjoserbšćinu móžemy tu wuzamknyć, dokelž jewi so tuta rěč jenož we wjesnych mjenach na pućnikach kaž tež w napisach, za kotrež je awtorstwo w delnjoserbskim rěčnym konteksće dopokazane.)