Zběrka tekstow Hanza Kóńcana (1865–1918)

W Serbskim kulturnym archiwje leži mapa z rukopisami z Rownoho něhdźe z lěta 1900. W njej su teksty, napisane wot Rownjana Hanza Kóńcana w korespondency a w nadawku fararja Mateja Handrika. Mapa wobsahuje listy kaž tež wšelake wopisanja, kaž na přikład nimoměry nadrobne předstajenje typiskeho burskeho statoka ze wšěmi twarjenjemi, płoninami a gratami. Nimo toho namakaja so w zběrce powěsće, burske a wjedrowe kaznje, anekdoty, wopisanja hrow, nałožkow a Slepjanskich drastow. Tež temy z archeologije, mjenowědy a stawiznow so wobjednaja.

Rukopisy su z wjetšeho dźěla w Slepjanskim dialekće napisane, mjeńši dźěl je hornjoserbski. Wone su so transkribowali a do němčiny přełožili. Z tym zmóžnjeja so dohlady do něhdyšeho Slepjanskeho wašnja žiwjenja a zdobom do powědanskeje kultury 19. lětstotka.