Warnoćicy. Serbske slědy
Přichad
Dwórnišća su kaž wrota do města. W lěće 1945, po skónčenju knjejstwa nacionalsocialistow, běštej Warnočanskej dwórnišći předewšěm městno migracije. Wuhnaće a wusydlenje Němcow z Čěskosłowakskeje potrjechi podłu hranicy nimale kóždeho němskorěčneho wobydlerja, z tym tež Warnočanskich. Město nich tu čěskosłowakske zarjady ludźi zasydlichu, kotrychž jako loyalnych, wustojnych a trěbnych posudźowachu. Tute nowe wobydlerstwo bě najwšelakorišeho pochada. Něhdźe štyri lěta běchu tež mnozy Serbja z Hornjeje Łužicy dźěl wobydlerstwa. Wšako přićahny po lěće 1945 wjace hač tysac Serbow do Čěskosłowakskeje, wjetšina z nich do Warnoćic. Přichadźacy Serbja buchu podpěrowani při pytanju za dźěłom abo wukubłanjom kaž tež při natwarje serbskeho šulstwa. Někotři Serbja a Češa so tehdy samo wo přizamknjenje Łužicy k čěskosłowakskemu statej prócowachu.
„Do Warnoćic?“
Wornar, Jan: Ze skałarskeje wjeski won do wulkeho swěta. Z brěmješka dopomnjenkow na čas we Warnoćicach wot Jana Wornarja (1. pokročowanje). In: Serbske Nowiny, 05.08.1997, str. 4.
Wurězk, čita šulerka Serbskeho gymnazija w Budyšinje, 2024.
