Wotkazanje

Warnoćicy maja wažne městno w serbskich stawiznach. W dobje po II. swětowej wójnje bu městačko srjedźišćo zasydlenja Serbow w Čěskosłowakskej. Wosebje wuznamny je fakt, zo bu tu zakład za serbske šulstwo połoženy. Wjacore sta serbskich młodostnych dóstachu mjez 1946 a 1949 we Warnoćicach w swojej maćeršćinje wyše kubłanje. Tutón historisce krótki wotrězk stawiznow hódnoći so dźensa jako zakład rozkćěwa serbskeje kultury w druhej połojcy 20. lětstotka. Nawjazujo na wotkazanje tuteje doby zahaji so po lěće 1989 nowa faza wzajomnych kulturnych stykow. Město je zhromadne dźěło ze Serbami do swojeho programa zapřijało a bu jedna z městnosćow Mjezynarodneho swjedźenja serbskeje poezije. Tudyši Biskopski gymnazij a Serbski gymnazij w Budyšinje wotzamknyštej partnerstwo. Warnočanska měšćanska knihownja zarjadowa wotrjad serbskeje literatury. Čěsko-serbska kooperacija na polu kultury a kubłanja je wažny dźěl mjezy přesahowaceho žiwjenja w regionje a wjercholeše w lětach 2010–2013 we wobšěrnym projekće, kotryž je Europska unija spěchowała.

Previous Next