Žiwe kulturne herbstwo
Předstajace wuměłstwo a hudźba
Předstajace wuměłstwo saha wot wokalneje a instrumentalneje hudźby, wot reje a dźiwadła hač k pantomimje abo spěwanym hrónčkam. Wono wobsahuje mnohe kulturne wurazowe formy, kotrež wotbłyšćuja čłowječu kreatiwitu a kotrež namakamy tež w druhich wobłukach imaterielneho kulturneho herbstwa.
Mnohe formy předstajaceho wuměłstwa su dźensa wohrožene. Dokelž so kulturne praktiki standardizuja, zhubi so tradicionalna mnohotnosć. Samo popularne praktiki su wot toho potrjechene. Jenož dźěl z nich profituje, druhe pak pod tym ćerpja.
Škitne naprawy za tradicionelne předstajace wuměłstwo dyrbja so předewšěm na daledawanje wědy a technikow, na wužiwanje a twar instrumentow kaž tež na skrućenje poměra mjez mištrom a šulerjom koncentrować. Nadrobnosće spěwa, pohiby reje a dźiwadłowe interpretacije měli so zesylnić.
Předstajenja móža so tež přeslědźić, nahrawać, dokumentować, inwentarizować a archiwować. Eksistuja njeličomne zwukowe nahrawanja w archiwach po cyłym swěće, wot kotrychž su mnozy starše hač lětstotk. Tajke nahrawanja su wohrožene a móhli so trajnje zhubić, jeli so njedigitalizuja. Digitalizacija zmóžni, dokumenty identifikować a inwentarizować.