Žiwe kulturne herbstwo
Ludowa rejowanska kultura
Hinak hač standardizowane towaršnostne reje dworjansko-aristokratiskeje kultury su ludowe reje wuraz wjesneje burskeje kultury. W pisomnych žórłach z prěnjeje połojcy 18. lětstotka je ludowe rejwanje w Serbach dokładźene.
W rituelnej abo towaršliwej formje su so reje z livehudźbu přez wjacore generacije traděrowali. Z toho časa maja ludowe reje wšědny dźeń kaž tež w zwisku z nałožkami a na swjedźenjach w běhu lěta wažne funkcije za zhromadźenstwo. Wot kónca 19. lětstotka płaća wone jako powšitkowne kubło, tola popušćowaše so ludowe rejwanje krok po kroku.
Tak mjenowani rejwanscy mištrojo kaž tež ludowe rejwanske a drastowe skupiny započachu, hišće znate ludowe reje před zabyćom wobchować a zaso wědomje hajić a traděrować.
Wot srjedź 20. lětstotka wuwiwaše so paralelnje k tomu profesionalizowana rejwanska folklora, kotraž ludowe reje za jewišćo adaptowaše a choreografowaše. W 21. lětstotku etablěrowaše so po přikładźe madźarskeho hibanja swobodne towaršliwe rejwanje, zdźěla zaso z livehudźbu.
Ludowe reje su přeco hišće wažny wobstatk wšelakich nałožkow, wosebje wot młodźiny w Delnjej Łužicy organizowany Zapust. Nimo toho namakaš ludowe reje dźensa na swjatočnosćach a swjedźenjach runje tak kaž na jewišćach a festiwalach.
