Žiwe kulturne herbstwo
Błótowske rybarstwo
Rybarstwo w Błótach ma dołhu tradiciju, kotraž je wusko zwjazana z wobsydlenjom na wodźizny bohateje nižiny Sprjewje. Jako drje najstarša dźěławosć za zežiwjenje w Błótach je wone dźěl kultury wšědneho dnja.
Něhdy bě rybarstwo esencielne za přežiwjenje. Dźensa dźe wosebje wo plahowanje rybow a zdźerženje lětstotki stareje tradicije.
Po tym, zo kupichu Bórkowske gmejny w aprylu 1927 statne rybarske prawa za Sprjewju a pódlanske rěčki, załoži so 1952 „Rybarske zhromadźenstwo Bórkowy a wokolina“. Hižo tehdy běštej hajenje a zachowanje tutoho stareho serbskeho kulturneho herbstwa zaměr zhromadźenstwa.
30. nowembra 1991 załoži so „Zhromadźenstwo serbskich błótowskich rybarjow Bórkowy a wokolina z. t.“ W rybarskim zhromadźenstwje skutkuje mjeztym 17 skupin rybarjow z něhdźe 150 čłonami we wokrjesach Sprjewja-Nysa, Dubja-Błóta, Hornje Błóta-Łužica a w měsće Choćebuz.
Zhromadźenstwo wotnaja rybarske prawa a čłonojo wotpowědnu kónčinu zhromadnje rybarsce wužiwaja.
Za wukonjenje rybarstwa je wuspěšne wotzamknjenje zakonsce předpisaneho, wobšěrneho wosebiteho kursa wuměnjenje. Błótowscy rybarjo wužiwaja přeco hišće jedno- a třisćěnowe stajenske syće, łaty a wjerše za łójenje běłeje ryby, šćuki, liny, sandaka, wuhorja a mjenka. Łójenske nastroje so tradicionelnje sami zhotowjeja.
Aktiwnje praktikuje so plećenje sakow za wjerše a zamjetaki kaž tež za stajenske saki w groblach. Tuta wěda so tež zajimcam dale dawa.
Lětne naprawy słušeja runje tak k wažnym nadawkam zhromadźenstwa kaž přewod wodźiznotwarskich naprawow a přirodoškitnych projektow. Při tym pěstuja rybarjo wuske zhromadne dźěło a wuměnu ze susodnym „Zwjazkom błótowskich rybarjow Lubnjow a wokolina z. t.“
Zhromadźenstwo wobdźěli so na diskusijnych formatach a rozmołwach wo wuwiću Błótow. Přez wobdźělenje na regionalnych swjedźenjach, dale přez přednoški, zestajenje filmowych dokumentow a aktualnu homepage zasadźi so aktiwnje za towaršnostne zaznaće tuteje jónkrótneje tradicije.
Za naslědne błótowske rybarstwo budu wuskutki klimoweje změny na wodźiznu a dotal njewujasnjeny wobchad z dołhodobnje falowacej wodu Sprjewje jako sćěh kónca wudobywanja wuhla we Łužicy wulke wužadanja do přichoda.
