Metodika

Wuwiće webaplikacije wo praktikach imaterielneho kulturneho herbstwa w Delnjej Łužicy bazuje na třoch dźěłowych kročelach.

Jako prěnje dyrbjachu so trěbne techniske zakłady za zapisowanje datow stworić inkl. modelěrowanja a managementa datow kaž tež natwara clustera datowych bankow.

Natwari so datowa banka wo kulturnych formach, do kotrejež so hižo wobstejaca onlinowa datowa banka z nałožkami a swjedźenjemi we wokrjesu Sprjewja-Nysa zapřija. Slědowaše rozšěrjenje na dalše kulturne formy a na cyły serbski sydlenski rum Delnjeje Łužicy.

Druha kročel bě modelěrowanje datoweje banki za dokłady wo wšelakich praktikach imaterielneho kulturneho herbstwa. K tomu słušeja ertne tradicije, předstajace wuměłstwo, towaršnostne nałožki, rituale a swjedźenje, wěda wo přirodźe kaž tež tradicionalne rjemjeslniske techniki.

Wažne bě při tym zapřijeće lokalnych nošerjow a ekspertow imaterielneho kulturneho herbstwa. Tole sta so hłownje přez nawjazanje a pěstowanje stykow za čas projektoweje doby.

Při tym so prawidłownje najwšelakoriše dokłady identifikowachu, zběrachu a kuratěrowachu, wosebje z pomocu rešeršow za literaturu w hamtskich łopjenach, nowinach a socialnych medijach. Kwalitatiwne metody dokumentowanja kaž wobkedź­bowanja na městnje, tekstowe a wobrazowe dokumentacije abo rozmołwy z ekspertami wudospoł­njachu postupowanje.

Zo bychu ciwilno­towarš­nostni, kulturno­turis­tiscy a kreatiwno­hospodarscy akterojo daty trajnje wužiwać móhli a z tym za zdźerženje a dale­wuwiće serbskich tradicijow a kulturnych formow přinošowali, planuje so dale­wuwiće digitalnych móžnosćow za zjawne a wědomostne wužiwanje.

Tole zmóžni pohłubšeny přistup do clustera datowych bankow a słuži z tym kulturno­wědomost­nemu a socio­linguis­tiskemu slědźenju.

Wuwiće specifiskich wužiwar­skich přistupow započa so ze zapodaćom datow do datoweje banki wot lěta 2024.

Z webaplikaciju steji nětko prěni standardny přistup na wubrany datowy paket kulturnych formow za zjawne wužiwanje k dispoziciji, kotryž so hač do kónca 2025 dale předźěła a rozšěri.

Nimo toho ma so 2025 prěni fachowy přistup za wědomostne wužiwanje zwoprawdźić.