Žiwe kulturne herbstwo
Tradicionalne rjemjeslniske techniki
Tradicionalne rjemjeslniske wuměłstwo je snano najbóle widźomny wuraz imaterielneho kulturneho herbstwa. UNESCO-zrěčenje z lěta 2003 zaběra so hłownje z kmanosćemi a znajomosćemi, kotrež su z rjemjesłom zwjazane, nic pak z rjemjeslniskimi wudźěłkami samymi.
Město fokusěrowanja na zachowanje rjemjeslniskich objektow, měli so škitne prócowanja skerje koncentrować na podpěru rjemjeslnikow, zo bychu dale rjemjeslniske wudźěłki zhotowjeli a swoje kmanosće a swoju wědu druhim dale dawali, a to wosebje znutřka swójskich zhromadźenstwow.
Eksistuja mnohe formy tradicionalneho rjemjeslniskeho wuměłstwa: graty, drasta a debjenki, kostimy a rekwizity za swjedźenje a předstajace wuměłstwo, chowanske sudobja, objekty za składowanje, transport a škit, dekoratiwne wuměłstwo a ritualne objekty, hudźbne instrumenty a domjacne utensilije kaž hrajki, kotrež słuža zabawje abo kubłanju.
Runja druhim wobłukam imaterielneho kulturneho herbstwa je globalizacija tež za přežiwjenje tradicionalnych formow rjemjeslniskeho wuměłstwa wulke wužadanje. Masowa produkcija, njech je to produkcija wulkich multinacionalnych koncernow abo lokalnych zawodow, móže za wšědne žiwjenje trěbne twory husto tuńšo a w krótšim w času poskićeć hač rjemjeslniske zhotowjenje.
Kaž pola druhich formow imaterielneho kulturneho herbstwa wobsteji zaměr škita w daledawanju wědy a kmanosćow, kotrež su z tradicionalnym rjemjesłom zwjazane. Dźe wo to, zo by wuměłske rjemjesło tež w přichodnych generacijach eksistowało, zo bychu so rjemjeslnicy wot toho zežiwić a dale kreatiwni być móhli.
Žiwe kulturne herbstwo
Błótowski čołm
Twar a wužiwanje