Na tutej platformje k rěčnej krajinje Slepo so wěda kołowokoło serbskeho charaktera regiona a Slepjanskeje serbšćiny znazornja a wužiwanju spřistupnja. Portal wuwi so jako prototyp za informaciski forum, kotryž ma we wobłuku naprawow w zwisku ze strukturnej změnu słužić jako baza za dale a bóle wobšěrne předstajenje serbskich rěčnych krajinow w Hornjej a Delnjej Łužicy. Při tym su kulturne a rěčne wobstejnosće dialektnej kónčinje, wobstejaceje z jeno sydom wjeskow ze Slepom jako wosadnej wsu w srjedźišću, kmane wuchadźišćo za rozmyslowanja wo serbskich rěčnych krajinach. Slepjanski region w serbskim sydlenskim rumje w Sakskej je hižo wjele lětdźesatkow wot brunicoweho hórnistwa potrjecheny. Přesydlenje wjacorych wjesnych dźělow a hłuboko sahace zarězki do historisce zrosćeneje kulturneje krajiny pospěšichu zdobom pozhubjenje praksy a wědy wo regionalnym serbskim kulturnym herbstwje. Wosebita warianta rěče (Slepjanska serbšćina), swójska narodna drasta, charakteristiska ludowa hudźba a hač do dźensnišeho pěstowane nałožki swědča wo serbskich korjenjach regiona. Tu zhromadźene temowe wobłuki skića dohlady do mnohotnosće rěčneje krajiny Slepo a zdobom do tamnišeho dokumentaciskeho projekta Serbskeho instituta. Přez tři lěta bu we wuskim zhromadnym dźěle z lokalnymi akterami rěčne herbstwo Slepjanskeho regiona wobšěrnje inwentarizowane a spřihotowane, zo bychu so serbski charakter regiona kaž tež materielne a imaterielne serbske kulturne herbstwo předstajili a wužiwanju lěpje spřistupnili.
W tutym wobłuku namakaće wobrazy serbskorěčnych elementow w zjawnym rumje gmejny Slepo.
Žiwa Slepjanska serbšćina z Trjebina a Brězowki: Žonje a muž powědaja wo swojich dožiwjenjach.
Tu namakaće zběrku wjac hač 250 pisomnych žórłow, kotrež zaběraja so ze Slepjanskej wosadu: ze serbšćinu, wuznamnymi wosobinami, ze serbskej kulturu a serbskimi stawiznami.
Hrjebajće tu w zakładnym słowoskładźe Slepjanskeho dialekta. Na zakładźe historiskich žórłow a nowšich pólnych slědźenjow su so słowne lisćiny a słownički zestajeli a z pytanskej funkciju wuhotowali.
Podajće so na wuprawu po sydom Slepjanskich wsach a wotkryjće mjena polow, łukow a dalšich ratarskich ležownosćow ze zběrki Arnošta Černika.
Zo by so wěda wo Slepjanskej serbšćinje tež w ćišćanej formje zjimała, je so zestajał rěčny přewodnik, kotryž zmóžnja konwersaciju w Slepjanskej serbšćinje, informuje wo rěčnej krajinje a poskića zdobom krótku gramatiku a słownik.
Na tutym městnje su zezběrane dalše dokumenty, kotrež su wažne a njenarunajomne při zaběrje ze Slepjanskej rěčnej krajinu.
Nazhońće wjace wo pozadkach projekta a wo projektowej skupinje.