Někotre serbskorěčne napisy su so w projektowej dobje wotstronili, na př. hornjoserbski postrow na škleńčanych durjach Netto-wikowanišća w Slepom a turistiska informaciska tafla mjez hosćencom a cyrkwju, abo wone zhubichu so při wottorhanju twarjenjow: to płaći za wulkoformatowej hornjoserbskej napisaj na fasadźe stareje Slepjanskeje šule, kotrejž wobohaćeštej hač do lěta 2021 Slepjansku rěčnu krajinu.
Relikt z NDRskeho časa zhubi so spočatk lěta 2022: bě to něhdyši napis napis Brězowskeje rady gmejny, kotrehož hornjoserbski tekst bě zdźěla wot wabjenskeje tafle zakryty, zdźěla pak hišće widźomny.