Warnoćicy. Sorbian traces
Sport
Warnoćicy skićachu w powójnskim času tež horliwym sportowcam tójšto móžnosćow: ćěłozwučowarnje, stadion, sportnišća, kupjel pod hołym njebjom abo městna za zymski sport. Jara woblubowana běše kopańca. W stadionje při dwórnišću hrajachu na přikład čěske mustwo Hraničáři, mustwo juhosłowjanskich dźěłaćerjow Omladina abo Serbska młodźina Warnoćicy – mustwo serbskich gymnaziastow. Mnozy Serbja nawuknychu we Warnoćicach wolejbul hrać, tak zo bu tutón sport pozdźišo tež we Łužicy popularny. Sport pak słužeše tež politiskim zaměram, přetož ćělna fitnes jednotliwca płaćeše jako zakład stroweho, sylneho a wobory kmaneho naroda. W tutym duchu angažowachu so wšelake čěske ćěłozwučowarske towarstwa, tak tež čěski Sokol. Někotři serbscy młodostni wobdźělachu so na kursach ćěłozwučowanja Warnočanskeho Sokola. Dwójce poda so skupina serbskich sportowcow a holcow w serbskej drasće na wulki sportowy zlět do Prahi: 1947 na sportowy swjedźeń čěskosłowakskich šulow a 1948 na XI.°Wšosokołski zlět.
„W zymje sportowa družina čisło jedyn“
Wornar, Jan: W čěskich swójbach dobrych přećelow měli. Z brěmješka dopomnjenkow na čas we Warnoćicach – wot Jana Wornarja (5. pokročowanje). In: Serbske Nowiny, 02.09.1997, str. 4.
Wurězk, čita šulerka Serbskeho gymnazija w Budyšinje, 2024.
