Dokelž wuchadźa iniciatiwa za plakaty a wuwěški wot najwšelakorišich akterow, wobkedźbujemy w tutym konteksće najwjetšu wšelakorosć rěčow. Cyrkwina wosada kooperuje we wuwěškach z Choćebuskim Towarstwom k spěchowanju serbšćiny w cyrkwi, kotryž ćišći plakaty w delnjoserbšćinje. Serbski kulturny centrum wupowěša tež wabjenske plakaty za zarjadowanja w třikrajowym róžku, na kotrych móžemy nimo němčiny tež pólšćinu a čěšćinu čitać. Za swójske zarjadowanja wabi kulturny centrum w hornjoserbskej rěči. Wuwěški Njepilic dwora w Rownom abo Trjebinskeje Domowinskeje skupiny su zwjetša hornjoserbske, tola přeco z wěstym podźělom Slepjanskeje serbšćiny.