W Slepom steji Němsko-serbski šulski kompleks, w kotrymž su wyša a zakładna šula, hort, biblioteka a sportowe připrawy z dwurěčnymi taflemi wuhotowane. Dwurěčny (němsko-hornjoserbski) sćěnowy napis ma pěstowarnja w Brězowce. Při zachodźe dźěćaceho přebywanišća w Rownom pokazuje tafla ze serbskim holčim předmjenom Milenka a wotpowědnym signetom na to, zo dźěła přebywanišćo po imersiskim koncepće Serbskeho šulskeho towarstwa z mjenom „Witaj“ (přir. Modelowy projekt „Witaj“ w Serbskim kulturnym leksikonje).