Serbske napisy su so w Slepjanskej wosadźe jenož hišće na dwěmaj kěrchowomaj zachowali: w Rownom a w Trjebinje. Rownjanski kěrchow ma hladajo na prezencu serbšćiny wosebitu poziciju. Tu njesteja jenož tři kamjenje z nowšeho časa, wot přiwuznych wuhotowane ze serbskimi słowami, ale wón je wot lěta 2011 tež wopomnišćo zachowanych historiskich narownych kamjenjow. W dobje wot 1873 do 1919 nastate kamjenje zbudźichu w 1980tych lětach nowu skedźbnosć. Wulki dźěl narownych kamjenjow bu 1990 wuchowany, 2006 do lisćiny kulturnych pomnikow w Swobodnym staće Sakskej přiwzaty a 2009 dokumentowany (hlej Publikacija z lěta 2011). Na nich zachowane hrónčka a daty zemrětych pokazuja jónkrótne splećenje tehdyšeje ewangelskeje hornjoserbšćiny a domoródneje Slepjanskeje serbšćiny, při čimž je Slepjanska serbšćina jasnje spóznajomna a spožča hornjoserbšćinje wosebitu regionalnu barbu.
Hornjoserbsko-němska drjewjana tafla na starej Trjebinskej ćěłowni ma so hišće w lěće 2022 z čitajomnej kopiju narunać.
W Trjebinje wobsteji pódla komunalneho kěrchowa pohrjebnišćo sowjetskich wojakow z wojerskim pomnikom z ruskim napisom. Na tutym pohrjebnišću je wjace hač 500 wojakow a oficěrow pochowanych, kotřiž padnychu mjez 17. a 20. aprylom 1945 tu a w dalšej wokolinje.