Pozadk

Zaměr projekta „Digitalny portal k serbskim a łužiskim rěčnym a kulturnym krajinam“ je, na wjace­rěčnym a bjez­barjernym online-portalu serbske kulturne herbstwo w Delnjej Łužicy prezentować.

Za to maja so k wšelakim serbskim aspektam delnjo­łužiskeje kulturneje krajiny – mjez druhim k kulturnym praktikam a materielnym swědkam, delnjo­serbskemu pismowstwje kaž tež k swójskim mjenam a serbskim elementam rěčneje krajiny – daty wědomostnje zběrać a za wužiwanje spřihotować.

Adresaća su slědźerjo, ale tež zajimowani a regionalnje skutkowacy kulturnicy w towarstwach abo na polu kubłanja, kulturneho turizma a w kreatiwnej branši.

Na tajke wašnje je serbske rěčne a kulturne herbstwo regiona w zjawnosći lěpje widźeć a je za přichodne generacije zawěsćene, tak zo móža je wužiwać.

Na kotre zrozumjenje kulturneho herbstwa so projektowy team při tym złožuje, rozjasni dolno­serbske widejo „Co jo serbske kulturne derbstwo?“ (Što je serbske kulturne herbstwo?):

Projekt „Praktiki imaterielneho kulturneho herbstwa w Delnjej Łužicy“ ma zaměr, fachowu wědu wo mnohotnosći žiweho kulturneho herbstwa Serbow wotkryć.

K tomu słušeja po UNESCO-zrěčenju wo zdźerženju imaterielneho kulturneho herbstwa z lěta 2003 nimo ertnych tradicijow a předstajaceho wuměłstwa tež towaršnostne nałožki, rituale a swjedźenje, wěda wo přirodźe kaž tež tradicionalne rjemjeslniske techniki.

Projekt wobmjezuje so tuchwilu na Delnju Łužicu w Braniborskej, ma so pak w přichodźe rozšěrić. Zapřijeja so wuslědki a nazhonjenja z hižo wotzamknjeneho projekta „Systematiske a aktualizowane zapisanje wobstatka nałožkow a swjedźenjow w Delnjej Łužicy“.

W nim wužiwachu standardizowane naprašniki za dokumentowanje towarš­nostnych nałožkow a swjedźenjow, kotrež orientowachu so po požadanju wo zapisanje do cyło­zwjaz­koweje lisćiny imaterielneho kulturneho herbstwa. Dale natwari so prototyp datoweje banki wo nałožkach a swjedźenjach we wokrjesu Sprjewja-Nysa.

Nimo konsolidacije, wutwara a běžneho hladanja datoweje banki z praktikami imaterielneho kulturneho herbstwa maja so digitalne wužiwarske móžnosće za zjawnosć kaž tež za wědomostne prašenja wuwiwać, zo by so na slědźerske prašenja reagowało, na př. hladajo na žiwu bi- a wjace­kultur­nosć wšědneho dnja, na kulturnu reziliencu abo tež na nałožowanje delnjo­serbšćiny w kulturnych praktikach Delnjeje Łužicy.

We wobłuku projekta nastata syć nošerjow, podpěraćelow a fachowcow imaterielneho kulturneho herbstwa ma w zmysle ciwilno­towarš­nost­neje a kubłansko­politiskeje trans­misije słužić natwarej poradźowarnje k praktikam imaterielneho kulturneho herbstwa.

Poradźowanski běrow ma jako kontaktowy partner za towarstwa, skupiny a zajimcow ze serbskeho resp. regionalneho konteksta fungować a mjez druhim iniciatiwy a powabjenja wo přiwzaće kulturnych formow a dobrych praksowych přikładow do cyłozwjazkoweho zapisa imaterielneho kulturneho herbstwa fachowje přewodźeć.